September 28, 2010

ఇంకో ఓం ప్రథమం...

గత ఏడాదిగా అచేతనంగా వున్న ఈ బ్లాగుని మళ్ళీ మొదలు పెడుతున్నాను. అలాగే ఇంతదాకా "అక్షరాపేక్ష"గా వున్న దీని పేరును కూడా, నా తొలి బ్లాగు పేరు "కలం కలల"కు మారుస్తున్నాను. ఇదివరకూ రాసిన రెండు తడవలూ నా బ్లాగును చూస్తే నన్ను నేను మరీ సీరియస్‌గా తీసుకున్నట్టు తోస్తుంది. అప్పటికీ ఇప్పటికీ ఈ చోటుకు నేనిచ్చే గౌరవం ఏ మాత్రం మారలేదు. కానీ, ఈ సారి నన్ను నేను కాస్త తేలిగ్గా తీసుకోదలిచాను. బ్లాగు ఎలా వుంటుందన్న దానిపై కొత్తగా చెప్పేదేమీ లేదు. ఈ విషయంపై నేనిదివరకూ అక్కడాయిక్కడా రాసి వున్నాను:

>> మేనిఫెస్టో

>> ప్ర్రారంభం

>> :-)

ఇదివరకట్లా కాకుండా, ఈసారిక్కడ సందడికి లోటు వుండకపోవచ్చు. ఎందుకంటే, ఇప్పుడిది నా బ్లాగు కాదు; మా బ్లాగు. అసలీ ఉత్సాహానికంతటికీ పరోక్ష కారణమైన నా నేస్తం సంహిత కూడా నాతో రాస్తుంది. తను కవి. అయితే, చాలా మచ్చుల్లా కవిత్వానికి జీవితాన్ని వేలాడేసే తరహా కాదు, జీవితానికి కవిత్వమొక చమ్కీదండ అంతే! తనిక్కడ రాయడం ఈ నెలవుకో విలువ తెస్తుందని నాకు ఆనందం.

పైన అన్ని లింకులిచ్చి అన్ని చెప్పినా మళ్ళీ చెప్పేదేమిటంటే, ఇక్కడ "ఇది రాయాలీ, ఇంత బాగా రాయాలీ, ఈ తరచుదనంతో రాయాలీ" అని మేమే గిరీ గీసుకోలేదు. ఉరకలెత్తే మా ఊహలు ఏ మేరలు చేరాకా శోషొచ్చి మారాం చేస్తాయో, అవే మా హద్దులు. ఇక్కడి రాతల విలువకు గీటురాళ్ళు మా దగ్గరే వున్నాయి. అభినందనలూ, అభిప్రాయాలూ, సలహాలూ, విమర్శలూ అన్నిటికీ జోలె పడతాం. మాకు జ్ఞానోదయాలు కలిగించే సదవకాశం మాత్రం మాకే అట్టేపెట్టుకుంటున్నాం.

Read on! :)