December 14, 2010

చొక్కా - చైతన్యం

"మనస్సుకి [చైతన్యానికి] పునాది ప్రాణం. ప్రాణం లేని చోట మనస్సు వున్నట్టు ఋజువు చెయ్యలేము. ప్రాణం ప్రకృతికి [పదార్థానికి] సంబంధించింది గనుక, మనస్సుగూడా ప్రకృతికి సంబంధించిందే!"

~ గోపీచంద్, పోస్టు చెయ్యని ఉత్తరాలు


చొక్కా వేలాడటానికి ఆధారం కొక్కెం. కొక్కెం లేని చోట చొక్కా వేలాడదీయలేము. కొక్కెం గోడకి సంబంధించింది గనుక, చొక్కా కూడా గోడకి సంబంధించిందే! :)

* * *

నాలా "సత్యమా, ఏ దారి నీ గర్భగుడికి!" అనుకుంటూ బిక్కుబిక్కుమంటూ నాలుగురోడ్ల కూడల్లో రెక్కమాను క్రిందే చక్కర్లు కొట్టేవాళ్లకి తత్త్వశాస్త్రంలో చొప్పించిన మెటఫొర్లు ఎంత శ్రమ తప్పిస్తాయో కదా, తప్పుడు దార్లేమో కాస్త తరచి చూసుకోవటానికి! ఈ చొక్కా కొక్కెం పోలిక మాత్రం నాది కాదండోయ్. అది బెర్గ్‌సన్‌ది. నేను గోపీచంద్‌ని తిరస్కరించటానికి వాడుకున్నానంతే:

"Consciousness depends upon the brain, and falls with it; but so does a coat fall with the nail on which it hangs, — which does not prove that the coat is an epiphenomenon, an ornamental ectoplasm of the nail."

కానీ ఎంత అందమైన అరుదైన పోలికో కదా, విశ్వస్రష్ట తన చైతన్యాంశనేదో చొక్కాలా కాసేపు మన మేకు మెదళ్లకి తగిలించిపోతాడంటే! ఆ కాసేపూ మనం మేల్కొని ప్రాపంచిక సంరంభంలో పాల్గొని, మళ్ళీ అతనేదో పనున్నట్టు చొక్కా లాగేసుకోగానే ఉన్నపళాన జడమై చచ్చిపోతామంటే!

But why my already quite mystical bent is still giving a hoot about the proofs? I really don’t know! :)

.

December 1, 2010

ప్రేమాయణం

తమసా తీరాన మన క్రౌంచ మిథునంలో నీ జోడు నేనయి,
బాణం దూసి బంధాన్ని హరించిన కిరాతకమూ నేనే అయి,
ధూళిధూసరిత విగతజీవం చుట్టూ రెక్కలల్లారుస్తున్న నీ శోకానికి
చలించి కన్నీటి శ్లోకాన్ని స్ఖలించిన కారుణ్యమూ నేనే అయితే,
మిగిలిపోయిన ప్రియతమా, ఫలితం అనాథ ప్రేమాయణం.
.